افواجِ پاکستان کو سلام: ایک صحافی کی طرف سے خراجِ تحسین
تحریر: عارف محمود قریشی، بیورو چیف (USA)، اوورسیز نیوز
صحافت کا میدان ایک ایسا شعبہ ہے جہاں سچائی، دیانت داری اور غیر جانبداری کو اولین حیثیت حاصل ہے۔ میرا صحافتی سفر اگرچہ طویل نہیں، مگر اس مختصر عرصے میں میں نے یہی سیکھا کہ جب بات قومی وقار اور ملکی سلامتی کی ہو، تو ہر پاکستانی کو یک زبان ہو کر اپنی افواج کے ساتھ کھڑا ہونا چاہیے۔
آج میں اپنی تمام تر صحافتی ذمہ داریوں کو ایک طرف رکھتے ہوئے، دل کی گہرائیوں سے افواجِ پاکستان کو سلام پیش کرتا ہوں۔ یہ وہ ادارہ ہے جس نے ہر مشکل وقت میں اپنی جانوں کا نذرانہ دے کر اس سرزمین کی حفاظت کی، دشمن کے ناپاک عزائم کو خاک میں ملا دیا، اور قوم کو تحفظ کا احساس دیا۔
افواجِ پاکستان صرف ایک عسکری قوت نہیں، بلکہ ایک نظریہ ہے، ایک جذبہ ہے، جو حب الوطنی، قربانی اور وفا کا استعارہ ہے۔ خواہ وہ بارڈر پر تعینات جوان ہوں یا دہشت گردی کے خلاف محاذ پر لڑنے والے سپاہی، ہر ایک کا کردار ناقابلِ فراموش ہے۔ ہمیں فخر ہے کہ ہماری فوج دنیا کی بہترین افواج میں شمار ہوتی ہے، جس کا وقار اور عزت دنیا بھر میں تسلیم کی جاتی ہے۔
بطور ایک محبِ وطن صحافی، میں یہ سمجھتا ہوں کہ ہمیں اپنی فوج کی قربانیوں کو اجاگر کرنا، ان کی خدمات کو سراہنا اور ان کے ساتھ اظہارِ یکجہتی کرنا ہمارا فرض ہے۔ دشمن ہمارے اتحاد کو کمزور کرنا چاہتا ہے، مگر ہم سب مل کر دشمن کے ناپاک عزائم کو شکست دیں گے۔
میں عارف محمود قریشی، آج اپنے پلیٹ فارم سے یہ اعلان کرتا ہوں کہ افواجِ پاکستان کے ساتھ اظہارِ یکجہتی کرنا نہ صرف میری قومی ذمہ داری ہے بلکہ میرے دل کی آواز ہے۔ پاک فوج زندہ باد، پاکستان پائندہ باد۔
